Oarsoaldea Behatokia

Oarsoaldearen Lan Merkatua

JOERA BAIKORRA OARSOALDEAKO HERRITARREN LAN-MERKATUAN
BAINA ORAINDIK LAN HANDIA DAGO EGITEKE

 

2023 urtea hasi berri den honetan, SEPE Espainiako Enplegu Zerbitzuak lan-merkatuari buruzko datuak argitaratu ditu. 2022 urtea amaitu eta errepasoa egin du eta, datuek erakusten dutenez, aurreko hilabeteetako joera jarraituta, urteko azken hilabeteetan ere behera egin zuen langabeziak. Zehatzak izateko, joan den abenduan 142.408 pertsona zeuden langabe gisa Hego Euskal Herrian eta, 2021eko abenduan, berriz, 4.463 langabetu gehiago erregistratu ziren. Nolanahi ere, datuak ez dira guztiz onak izan. Izan ere, 2022ko azaroan baino 205 langabetu gehiago izan ziren abenduan. Gipuzkoan ere, gauza bera gertatu zen: langabezia-tasak gora egin zuen azarotik abendura, 351 gehiago, baina 2021etik 2022ra 1.116 langabetu gutxiago zenbatu ziren.

Oarsoaldean fokua jarrita, Gipuzkoako Lan Behatokiko datuei erreparatuz, 2022ko azaroan 1.130 pertsona kontratatu ziren eskualdean; zehazki, 2.129 kontratu sinatu ziren. Horietatik, 470 emakumezkoak izan ziren eta 660 gizonezkoak. Kontratu motari begira, aldi baterakoak izan ziren 1.722 eta kontratu mugagabeak, berriz, 407. Ildo beretik, 1.598 pertsonari egin zieten jardunaldi osoko kontratua eta 531 herritarrek, aldiz, jardunaldi partzialeko kontratua sinatu zuten. Azken multzo horretan, nabarmentzekoa da sexuaren araberako aldea; izan ere, jardunaldi osoko kontratuen barruan, emakumezkoak dira 314 eta gizonezkoak, ordea, 1.284. Bere aldetik, jaioterria aintzat hartuta, azaroan kontratatu ziren pertsonen artean, 916 langile bertakoak dira eta 214 atzerritarrak.

Bestalde, Oarsoaldea eskualdeko langabezia datuei dagokienez, 2021 urteko abendutik 2022ko abendura arteko eskualdeko langabezia tasei erreparatuta, 0,57 puntuko jaitsiera izan dugu (2021 abenduan langabezia tasa 9,67koa zen eta 2022 urteko abenduan 9,1koa). Une honetan eskualdean 72.439 biztanle daudela kontuan hartuta % 4,61a dago langabezian une honetan.

  2022ko azaroan 3.344 pertsona langabetu zenbatu ziren eskualdean. Horietatik, 1.884 emakumezkoak ziren eta 1.460 gizonezkoak. Urte amaieran, berriz, pertsona langabetuen kopuruak zertxobait gora egin zuen, 3.361 herritar langabetu zenbatu baitziren abenduan. Langabezian egondako denborari begira, urtebete baino gutxiago pasa zuten lanik gabe 1.810 herritarrek (962 gizonezkok eta 848 emakumezkok); aitzitik, urtebete baino gehiago pasa zuten langabezian 1.534 pertsonak (922 gizonezkok eta 612 emakumezkok).

Langabezia-tasak erregistro hobeetan jarraitzen du, koronabirusaren pandemiaren hasierarekin alderatuta (% 9,69 2020ko otsailean). Era berean, Oarsoaldeko 2022ko abenduko datu hauek EAE osokoak baino hobeak dira (% 10,30eko tasa), eta zertxobait okerragoak Gipuzkoako lurralde historikoarekin alderatuta  (% 8,20ko tasa). 

Oarsoaldea osatzen duten udalerriei dagokienez, 2022ko abenduan Lezok % 7,90ko langabezia-tasa izan zuen;  Oiartzunek % 6,30ekoaPasaiak % 9,80koa eta Errenteriak % 9,80koaOiartzunen, Pasaian eta Errenterian, azarotik hona mantendu egin da langabezia-tasa, Lezon, berriz, 0,20 puntu igo da. Kasu guztietan, datu horiek EAEko batez bestekoak baino hobeak dira (% 10,30ko tasa). Horrez gain, Lezon eta Oiartzunen, langabezia-datuak Gipuzkoako lurralde historikokoak baino hobeak dira (% 8,30ko tasa).

  Honenbestez, Oarsoaldean langabetuen kopuruak behera egin du azken urtean 2022ko abenduan 3.361 pertsona zeuden lanik gabe, 2022ko urtarrilean baino 152 pertsona gutxiago (3.513 pertsona).

Laburbilduz, urte osoko ikuspegiari helduta, gure eskualdean lan-merkatuak joera positiboa izan duela ondoriozta dezakegu. 2022ko azken hilabetean langabetu gehiago zenbatu baziren ere, bilakaerak erakutsi du joera baikorra duela Oarsoaldeako herritarren enpleagarritasunak.

Hala ere, inplikatutako eragile guztiek ahalegin handia egiten jarraitzen dute eskualdeko herritarren enplegagarritasuna mantendu eta hobetzen jarraitu dezan.










Partekatu Oarsoaldeko lan-merkatuaren behatokia!

#ASTEKONOMIA

 

EUSKAL EKONOMIAREN TERMOMETROA

KOIUNTURA DI-DA BATEAN