Hasteko, talentuari eskainitako web atala sortu da web gune nagusiaren barnean. Web horrek gaiari buruzko topaleku izan nahi du enpresentzat eta gaiari buruzko interesa duten banakoentzat; artikuluak, hausnarketak, lan akademikoak, liburuak, hitzaldiak, audioak, bideoak eta abar aurki daitezke bertan. Nahi duen orok zabalik du bertan parte hartzeko aukera eta, hala, atal hori elikatzen laguntzekoa.

Bestetik, martxoaren 15erako Enpatikonomia jardunaldiaren laugarren edizioa antolatu du Oarsoaldeak Oiartzungo Zinealdean Zinealdea eraikina (Lintzirin gaina industria gunea. Oiartzun), goizeko 09:00etan hasita. Jardunaldiak lanaren zentzua eta talentua izango ditu ardatz eta XXI. mendeko enpresa aurreratu izateko bidean gai horiek nola kudeatu ikusteko aukera izango dute bertaratzen direnek. Hitzaldiak, mahai-inguruak eta praktika onak baliatuz, talentua sortu, garatu, elikatu, eutsi, zaindu, erakarri… egiten dela ikasiko dute bertaratutakoek. Jardunaldia euskaraz izango da eta hain zuzen ere, euskara eta hizkuntzen kudeaketa egokia talentua erakartzeko eta zaintzeko funtsezko tresna dela azalduko dute, besteak beste (Ikus egitaraua). Jardunaldiaren amaieran, halaber, aitortza berezia egingo zaie euskara normalizatzeko era bateko edo besteko urratsak egin dituzten eskualdeko enpresei.

Jardunaldira presentzialki joateko aukeraz gain streaming bidez ikusi ahalko da.

Bertaratu nahi baduzu, eman izena!

Jardunaldia streaming bidez ikusi nahi baduzu, egin ezazu esteka honen bidez.

Otsailaren 16an, galdetegi digital anonimo bat zabaldu zuen garapen agentziak lanbide heziketako ikasleek, langileek eta herritarrek, oro har, lanari buruz dituzten usteak eta lanaren zein alderdi baloratzen duten gehien ezagutzeko. Galdetegia oso laburra da eta erraz betetzeko modukoa, euren iritzia ematera animatu dituzte herritarrak (Bete galdetegia).

Azkenik, jardunaldiaren ondotik, apirilaren 19an, gaiari buruzko lan-ondoko bat egiteko asmoa du Oarsoaldea Garapen Agentziak. Lan ondoko hori oraindik zehaztu gabeko leku eta ordu batean izango da, arratsaldez izango da, hori bai. Gaiaren inguruan hizketan eta hausnarrean jarraitu nahi duten pertsona eta eragileei zabalik egongo da. Modu hurbilago eta informalago batean solasean aritzeko aukera emango du ekitaldiak eta eskualde honetarako ideiak, ildoak eta elkarlanak josteko aukera eman dezakeela sinetsita daude agentziako arduradunak. Ahize AEK-ko teknikariek dinamizatuko dute saioa.

Eskualdeko lau udalek eta Oarsoaldea Garapen Agentziak dei egin diete lau herrietako enpresei talentuari buruzko lanketa horietan aktiboki parte-hartzera.