LANGABEZIA-DATUEK BEHERANZKO JOERA MANTENTZEN DUTE ESKUALDEAN

Apirilean 919 pertsona kontratatu ziren Oarsoaldean, guztira 2.053 kontratu sinatuz. Eskualdeko langabezia-tasa %8,79koa da, inertzia positiboarekin jarraituz.
 

SEPE Espainiako Enplegu Zerbitzuak lan-merkatuari buruzko datuak argitaratu ditu hilabete honetan. Apirileko 2023ko datuek adierazten dute behera egin duela langabeziak aurreko hilabeteko datuekin alderatuta. Zehazki, 2023ko martxoan 108.614 pertsona zeuden langabe gisa Hego Euskal Herrian eta, 2023ko apirilean, berriz, 107.416; hau da, 1.198 langabetu gutxiago erregistratu dira. Gipuzkoako lurraldean joera hori ere mantetzen da (2023ko martxoan, 28.430 langabetu; 2023ko apirilean, 28.204 langabetu, hau da, 226 pertsona gutxiago.
 

Langabezia-tasak behera egin du Oarsoaldean azken hilabete honetan

Gure eskualdean fokua jarrita, Gipuzkoako Lan Behatokiko datuei erreparatuz, 2023ko apirilean 919 pertsona kontratatu ziren eskualdean: zehazki, 2.053 kontratu sinatu ziren. Joan den urteko apiralarekin alderatuta, zifrak gora egin du, 1.333 kontratu sinatu baitziren une hartan, aurtengo otsailean baino 391 gutxiago. 

Kontratu motari begira, apirilean, aldi baterakoak izan ziren 1.725 eta kontratu mugagabeak, berriz, 328. Ildo beretik, 1.674 pertsonari egin zieten jardunaldi osoko kontratua eta 379 herritarrek, aldiz, jardunaldi partzialeko kontratua sinatu zuten. Azken multzo horretan, aurreko hilabeteetako joera jarraituz, nabarmentzekoa da sexuaren araberako aldea; izan ere, jardunaldi osoko kontratuen barruan, emakumezkoak dira 275 eta gizonezkoak, ordea, 1.399. Bere aldetik, jaioterria aintzat hartuta, apiirlean kontratatu ziren pertsonen artean, 733 langile bertakoak dira eta 186 atzerritarrak.

Bestalde, Oarsoaldea eskualdeko langabezia datuei dagokienez, 2022 urteko apiriletik 2023ko apirilera, 1,09 puntuko jaitsiera izan dugu (2022ko apirilean langabezia-tasa % 9,88ekoa zen eta 2023ko apirilean %8,79koa). Horregatik, urtebeteko marjinarekin alderatuta, langabeziak behera egin duela esan genezake. Une honetan, zehatzak izateko, eskualdean 72.439 biztanle daudela kontuan hartuta % 4,45a dago langabezian une honetan.

Langabezia-tasak erregistro hobeetan jarraitzen du, koronabirusaren pandemia garaiarekin alderatuta (% 11,86 2020ko apirilean). Era berean, Oarsoaldeko 2023ko apirileko datu hauek EAE osokoak baino hobeak dira (% 10,50eko tasa), eta zertxobait okerragoak Gipuzkoako lurralde historikoarekin alderatuta  (% 8,60ko tasa). 

Oarsoaldea osatzen duten udalerriei dagokienez, 2023ko apirilean Lezok % 7,90ko langabezia-tasa izan zuen; Oiartzunek % 6,20koa, Pasaiak % 9,30ekoa eta Errenteriak % 9,60ekoa. Urtarriletik hona, Lezon mantendu egin da langabezia-tasa, Oiartzunen zertxobait gora egin du (0,3 gora) eta eskualdeko gainerako udalerrietan, berriz, jaitsi egin da: Pasaian, 0,8 puntu eta Errenterian 0,7 puntu. Kasu guztietan, datu horiek EAEko batez bestekoak baino hobeak dira (% 10,10eko tasa). Horrez gain, Lezon eta Oiartzunen, langabezia-datuak Gipuzkoako lurralde historikokoak baino hobeak dira (% 8,10ko tasa).
 

Ikuspegi zabalari begira, lan-merkatuak joera baikorra du

 
Honenbestez, epe luzeko tartearekin aztertuta, Oarsoaldean langabetuen kopuruak behera egin du azken urtean; izan ere, 2023ko apirilean 3.228 pertsona zeuden lanik gabe, 2022ko apirilean baino 379 gutxiago (3.607 pertsona).

Laburbilduz, urte osoko ikuspegiari helduta, gure eskualdean lan-merkatuak joera positiboa izan duela ondoriozta dezakegu. 2023ko lehenengo hilabetean langabetu gehiago zenbatu baziren ere, bilakaerak erakutsi du joera baikorra duela Oarsoaldeako herritarren enplegagarritasunak.

Hala ere, inplikatutako eragile guztiek ahalegin handia egiten jarraitzen dute eskualdeko herritarren enplegagarritasuna mantendu eta hobetzen jarraitu dezan.