Oarsoarrak euskararen sarien garaikur berria izango dena sortzeko lehiaketa deitu zuen Oarsoaldeko Euskara Batzordeak joan zen azaroan.

Arte diziplina guztiei irekitako lehiaketak gainditu ditu ezarritako epeak eta, atzerapen pixka batekin bada ere, badakigu jada zein den lehiaketaren irabazlea eta garaikur berria nolakoa izango den.
Zazpi lan aurkeztu dituzte, guztira, lehiaketara. Horien guztien artean, Gema Lizarralde Gorosabel artista donostiarraren “Sustraiak II” lana hautatu du epaimahaiak, aurrerantzean, sei urtez bederen, Oarsoarrak Euskararen Sarien garaikurra izateko.

Epaimahaiaren erabakian dioenez, “balio erantsia du forma berari eutsiko dion baina urtero desberdina izango den garaikurra izateak. Inspirazio iturria alderdi natural edo paisajistikotik datorkio. Hala ere, proposamenak berak interpretazio eta irakurketa ugari irekitzen ditu (labekada desberdinetatik ateratzen den obra, pieza bakarra saridun desberdinen artean zatikatzea, kolektibo baten parte izatea, sustrai eta enborren metafora euskararen erroei eta hazkundeari keinua...)”. Epaimahaiak, halaber, lanaren izaera berritzailea azpimarratu du, sari-emateetako ohiko garaikurretatik urruntzen den lana dela deritzo.

Epaimahaia Oarsoaldeko herri bakoitzeko artista banak eta, urtero, saridunak erabakitzen dituen epaimahaiaren ordezkari batek osatu dute. Hala, Onintza Etxebeste, Ibai Maritxalar, Eider Perez, Garazi Kuesta eta Allende Arnaiz aritu dira epaile lanetan. Ez dute lan erraza izan, baina azkenean, puntuen baturak eginda, esan bezala,  “Sustraiak II” lanak bildu zituen puntu gehien. Erabakiaren berri maiatzaren 6an eman du epaimahaiak.

Lehiaketaren irabazleak urriaren 31ra bitarteko epea izango du orain, artelana egikaritzeko, garaikurra pieza gisa aurkezteko. Aurtengo Oarsoarrak sarien ekitaldian emango da, lehen aldiz, garaikur berria.
Oarsoarrak Euskararen Saria Oarsoaldeko lau udalek sortu zuten 2010ean jendarteko alor guztietan euskararen normalizazioan urrats esanguratsuak egin dituzten banako, elkarte, lantoki, erakunde nahiz taldeak sarituz, euskararen normalizazioari ikusgarritasuna emateko. Era horretara, hainbat eta hainbat eragilek egiten duten lana prestigiatzea bilatzen dute sariak eta sari-emate ekitaldiak. 
Lehiaketaren antolatzaileek eskerrak eman dizkiete lehiaketan parte hartu duten artista guztiei euren jarrera eta pazientziagatik.