• Maiatzaren 28tik 29ra bitartean, AZTI zentro teknologikoak eta Universitat Politècnica de Catalunya - BarcelonaTech (UPC) erakundeak antolatuta, MARTECH kongresuaren 12. edizioa egingo da Pasaiako udalerrian, itsas teknologien arloan nazioarteko erreferentea den topaketa.
• Programak itsas robotikan, adimen artifizialean, sentsorikan eta komunikazio-sistemetan izandako azken aurrerapenak jorratuko ditu, (offshore) energia berriztagarriak, arrantza, ozeanografia operazionala eta klima-aldaketaren ondorioen monitorizazioa bezalako sektoreetan aplikatuta.
   

Pasaia, 2025eko maiatzaren 27a – Maiatzaren 28an eta 29an egingo da Pasaiako udalerrian MARTECH nazioarteko kongresuaren 12. edizioa, itsas teknologien alorrean punta-puntako topaketa.

AZTI zentro teknologikoak eta la Universitat Politècnica de Catalunya – BarcelonaTech (UPC) unibertsitateko SARTI (Sistema Urruneko Akatsik Gabeko Informazioaren Tratatze Zentroa) ikerketa-taldeak antolatutako kongresuak, itsas berrikuntzaren ekosistemako hainbat eragileren laguntzaz, 100 aditu eta profesional baino gehiago bilduko ditu, ikerketa-zentro, enpresa teknologiko eta erakunde ezberdinetatik etorriak. Helburua: XXI. mendeko ozeanoen erronkei aurre egiteko zientziaren eta teknologiaren zeregin gakoa aldarrikatzea, ekonomia urdin iraunkorra abian jartzeko beharra azpimarratuz.

Teknologia ozeanoen zerbitzura

Bi jardunalditan zehar, MARTECH 2025 kongresuak itsas robotikan, sentsorika aurreratuan, komunikazio-sistemetan eta datuen arteko elkarreragingarritasunean egindako azken berrikuntzak aurkeztuko ditu, baita adimen artifizialaren eta itsas gune konplexuak simulatzeko erabilitako biki digitalen aplikazioak ere. Horrez gain, aplikazio praktikoak aztertuko dira arrantza jasangarrian, ingurumenaren zaintzan eta kostaldearen monitorizazioan, klima-aldaketari aurre egiteko, satelite bidezko teledetekzioa eta hondartzetako bidemetria barne.

Halaber, itsas behaketa-sareko nazioarteko ekimenak aurkeztuko dira, eta tokian bertan garatzen ari diren kostaldeko laborategien esperientzia praktikoak partekatuko dira, besteak beste, Pasaiako badian martxan dagoen Oarsoaldea Urdina ekimenaren barruan. Azken honek teknologiak benetako baldintzetan frogatzeko aukera eskainiko du.

Kongresuak Eusko Jaurlaritzaren, Pasaiako Portu Agintaritzaren eta Oarsoaldeko Garapen Agentziaren babesa du, bai eta nazioarteko erakunde eta sare hauena ere: EMSO ERIC (Europako itsas behaketa-sarea), JERICO-RI (ikerketa-infrastruktura), EuroGOOS, IEEE Oceanic Engineering Society, OBSEA urpeko behatokia, Euskal Itsas Foroa eta EUSKOOS itsas ozeanografia operazionaleko euskal sistema.

Maiatzaren 28ko hasiera-ekitaldia Teo Alberrok (Pasaiako alkatea), Aizpea Otaegik (Errenteriako alkatea eta Oarsoaldeko Agentziako presidenta), eta edizio honetako antolatzaileek – Anna Rubio (AZTIko Itsas Ingeniaritza eta Ozeanografia Operazionaleko arduraduna) eta Joaquim del Río (UPCko SARTI taldeko ikertzailea) – inauguratuko dute.

Ekonomia urdinari bultzada Oarsoaldeatik

Kongresuaren helburu nagusietako bat izango da tokiko eragileekin sinergiak sendotzea eta Oarsoaldeko eskualdea ekonomia urdin iraunkorrean erreferente bihurtzeko prozesuan laguntzea. Testuinguru horretan, Oarsoaldea Urdina izeneko ekimena nabarmentzen da, AZTIren, Oarsoaldeko Garapen Agentziaren eta Pasaiako Portu Agintaritzaren lankidetzarekin sustatua, Eusko Jaurlaritzaren Berpiztu programaren eta Lehentasunezko Jarduketa Eremuen (ZAP) estrategiaren babesean.

Lankidetza publiko-pribatua, lurralde-espezializazioa eta proiekzio internazionala oinarri hartuta, lankidetza-gune estrategiko hau itsas arloko irtenbide berritzaileak garatzeko polo nagusietako bat bihurtzen ari da. MARTECH 2025 kongresuak Pasaiako badia itsas teknologiaren eta ekonomia urdinaren arloko hub estrategiko gisa kokatzeko aukera paregabea eskaintzen du.

MARTECH-i buruz

MARTECH itsas teknologien ikerketaren dibulgaziorako foro entzutetsua da 2008tik. UPCn sortu zen, hain zuzen ere Vilanova i la Geltrúko campusean, SARTI taldearen egoitzan, teknologia itsastarrean aurrerapenak partekatzeko eta lankidetza bultzatzeko helburuarekin. Urteen poderioz, MARTECH Espainian ez ezik, gero eta gehiago nazioartean ere, erreferente bilakatu da, kongresu ibiltari moduan antolatuta.