Uztailaren 1ean egingo den ekitaldiak diseinuaren, berrikuntzaren eta enpresa-garapenaren arteko lotura aztertuko du, eta sektoreko erreferenteak zein eskualdeko enpresak bilduko ditu.

Diseinua ez da soilik estetika. Produktuak hobetzeko, marka indartzeko, erabiltzaileen esperientzia optimizatzeko eta merkatuan lehiakorrago izateko tresna estrategikoa ere bada. Ideia horretatik abiatuta, Oarsoaldeak GEROA DISEINATZEN programa aurkeztuko du uztailaren 1ean Agustinak Zentroan egingo den jardunaldi eta showroom berezi batean. 

Ekitaldiak enpresei aukera emango die diseinuak gaur egungo erronka industrial, teknologiko eta komertzialetan izan dezakeen eragina ezagutzeko, eta aldi berean eskualdeko eta Euskal Herriko diseinuaren ekosistemako eragileekin harreman zuzena izateko.

Diseinua, berrikuntza eta enpresa-estrategia mahai gainean

Jardunaldiaren ardatza diseinuak enpresen lehiakortasunean duen balioa izango da. Horretarako, HABIC klusterreko Eduardo Jiménezek hitzaldi inspiratzailea eskainiko du, eta ondoren mahai-inguru batean parte hartuko dute diseinuaren eta industriaren arloko hainbat profesionalek. 

Besteak beste, bertan izango dira Olaia Irulegi (DIARA), Ander Lizaso diseinatzailea, María Gorostegui (Ondarreta) eta Nerea Vesga (ABB Niessen), enpresa eta diseinuaren arteko lankidetzaren esperientziak eta etorkizuneko joerak partekatzeko. 

Erakundeetatik Aizpea Otaegik, Oarsoaldea Garapen Agentziaren presidentea eta Errenteriako alkateak eta Amaia Arregi Agirrek, Gipuzkoako Foru Aldundiko Ekonomia Sustapeneko zuzendari nagusiak parte hartuko dute.

Showroom-a: ideiak eta irtenbideak lehen eskutik ezagutzeko aukera

Ekitaldiaren ondoren, parte-hartzaileek showroom eta networking gune batean murgiltzeko aukera izango dute. Bertan, hainbat enpresa eta erakundek beren proiektuak, produktuak eta zerbitzuak aurkeztuko dituzte modu hurbilean. 

Showroom-ean parte hartuko dute, besteak beste, Salto, ABB Niessen, Ondarreta, Salva, Mausa 3D, Alkimo, Beissier, Nare Design, Blue Design, Ander Lizaso Design Studio, EIDE eta HABIC klusterrak. 

Antolatzaileen arabera, espazio hau aukera paregabea izango da inspirazioa bilatzeko, kontaktu berriak egiteko eta diseinuaren bidez negozio-aukerak identifikatzeko.

Oarsoaldeko enpresentzat pentsatutako ekimena

GEROA DISEINATZEN programaren helburua da diseinua enpresen eraldaketa-prozesuetan txertatzea eta eskualdeko enpresei berrikuntzarako tresna errealak eskaintzea. Horregatik, jardunaldia bereziki interesgarria izan daiteke industria-enpresentzat, produktu edo zerbitzu propioak garatzen dituzten negozioentzat, merkataritza-sektorearentzat eta etorkizuneko erronkei modu berritzailean erantzun nahi dieten erakundeentzat.

Informazio praktikoa

📅 Data: Uztailak 1
📍 Lekua: Agustinak Zentroa
🕧 Ordutegia: 12:30etik 14:30era (ondoren otordua)
🎟️ Parte-hartzea: Doakoa, izena emanda hemen

Diseinua enpresaren etorkizuneko inbertsio estrategiko gisa ulertzen dutenentzat, uztailaren 1eko hitzordua aukera interesgarria izango da ideiak, esperientziak eta lankidetza berriak ezagutzeko.

IKUSI EGITARAUA

Geroa diseinatzen programa

GEROA DISEINATZEN Oarsoaldeako enpresei diseinua lehiakortasuna, berrikuntza eta eraldaketa sustatzeko tresna estrategiko gisa erabiltzen laguntzeko sortutako programa da. Enpresa bakoitzaren egoeraren diagnostikoa egiten du, diseinuaren bidez hobekuntza-aukerak identifikatzen ditu eta ekintza-plan bat zein benetako proiektu pilotu bat garatzen laguntzen du, trantsizio berdeari, digitalari eta demografikoari lotutako erronkei erantzuteko. Prestakuntza edo aholkularitza hutsetik harago, GEROA DISEINATZENek diseinua enpresaren estrategia eta eguneroko erabakietan barneratzeko metodologia praktiko bat eskaintzen du.

www.oarsoaldea.eus/geroa-diseinatzen 

* Gipuzkoako Foru Aldundiaren laguntzaren bidez.