Ekainaren 18an “Arditik ardira” proiektuaren erakusketa aurkeztuko da Agustinak Zentroan, Latxa ardiaren artilearen prozesua eta artisau-lana balioan jartzeko helburuz sortutako ekimena. 

Artilea ardatz duen sormen, artisautza eta ingurumen-proiektu bat da “Arditik ardira”. Ekimenak artilearen ekoizpen-prozesu osoa erakusten du, arditik azken erabileretaraino, ikuspegi berritzaile eta garaikide batetik. Aldi berean, gaur egun artileak bizi duen erronka ekologikoa azaleratzen du, eta bere balio materiala, kulturala eta sortzailea aldarrikatzen ditu, erabilera eta aukera berriak sustatuz.

Proiektuak gure sustrai kulturaletan errotutako material bati begirada berria eskaintzen dio. Gaur egun, askotan hondakin ez birziklagarri gisa tratatzen den artilea, baliabide erabilgarri eta balio handiko elementu gisa berreskuratzea du helburu, artisautzaren eta artearen bidez.

Emakume sortzaileak eta diziplina anitzeko lankidetza

“Arditik ardira” hiru emakume ekintzaileren arteko lankidetzatik sortu da. Proiektuan parte hartu dute Idoia Lizeagak, arte floraleko maistra eta bitxigile artisauak; Mendi Urruzunok, argazkilariak; eta Olatz Pujana Larranagak, Arte Ederretan lizentziatu eta kontserbazio eta zaharberritzean espezializatutako profesionalak.

Hiru sortzaileen arteko sinergiak tokiko komunitatean eta artisau-sektorean eragin positiboa sortzea bilatzen duen proposamen sendo eta eraldatzailea garatzea ahalbidetu du. Gainera, ekimenak emakumeen ekintzailetza, ikusgarritasuna eta ahalduntzea sustatzen ditu, artisautzaren esparruan duten rola indartuz.

Artisautza balioan jartzea eta berrikuntza sustatzea

Proiektuaren helburu nagusietako bat artisautza lanbidea indartu eta biziberritzea da, balio kultural eta ekonomiko gisa. Ildo horretan, ekimena bat dator Agustinak Zentroaren nortasunarekin eta helburuekin, artisautzaren sustapena eta berrikuntza baititu ardatz.

Artilearen erabilera eta erabilera berriak aztertzearekin batera, teknikak tradizionalak eta ikuspegi garaikideak uztartzen dira. Horrek merkatuan aukera berriak sortzen laguntzen du, ofizioaren etorkizuna eta jarraitutasuna bermatzeko.

Hiru jarduera nagusi

Tailerrak

Proiektuaren lehen fasean hainbat tailer egin dira ezagutza eta sormena partekatzeko helburuarekin. Apirilean Lekuonan egindako lehen tailerrean parte-hartzaileek artilea lortzeko eta lantzeko prozesu osoa ezagutu ahal izan zuten.

Maiatzean, berriz, Errenteriako Merkatuzarrean eta Azo!ka egitasmoaren barruan, bigarren tailerra egin zen. Bertan, Oiartzungo artalde baten argazkien gainean ardi-artilearekin brodatzeko saioa eskaini zen, gazta dastaketa batekin osatuta. Jarduerak emakumeen parte-hartzea eta ahalduntzea sustatu ditu, historikoki emakumeen esku egon den jakintza eta praktika bati balioa emanez. Gainera, ehungintza gustuko duten emakumeen kolektiboei proiektuan zuzenean parte hartzeko aukera eman zaie.

Argazki-erakusketa

Ekaina eta uztaila bitartean Agustinak Zentroan ikusgai egongo da artilearen ekoizpen-prozesua dokumentatzen duen argazki-erakusketa. Horrez gain, tailerretan parte hartu duten pertsonek sortutako brodatu-lanak ere erakutsiko dira.

Land art instalazioa

Proiektuaren elementu ikusgarrienetako bat Agustinak Zentroko lorategian kokatutako land art instalazioa izango da. Zuhaitzen artean zintzilikatutako argazki monumental batek, artilez brodatuta, naturaren eta materialaren arteko elkarrizketa bisual eta sinbolikoa proposatzen du.

Komunitatea eta etorkizuna

“Arditik ardira” ekimenak tokiko komunitatean eragin positiboa sortzea du helburu, artisautzaren transmisioa eta aitortza sustatuz eta ofizioaren etorkizunerako bide berriak irekiz. Aldi berean, artisau-berrikuntzaren arloan erreferentziazko eredua izan nahi du, etorkizuneko proiektu eta ekimen berriak inspiratzeko.

Artilearen bidez kontatutako istorio kolektibo baten moduan, iragana, oraina eta etorkizuna harilkatzeko gonbidapena egiten du proiektuak.

Inaugurazioa eta bisitak

Erakusketaren inaugurazioa ekainaren 18an izango da, 19:00etan, Agustinak Zentroan. Ekitaldia herritar guztientzat irekia izango da.
Ondoren, erakusketa eta instalazioa zentroaren ohiko ordutegian bisitatu ahal izango dira. Gainera, 10 laguneko taldeentzako bisita gidatuak antolatzeko aukera eskainiko da.

Informazio gehiago edo bisita gidatuak antolatzeko:

Idoia Lizeaga
📧 idoializeagaiturralde@gmail.com
📞 629 26 57 86