20 eta 44 urte bitarteko adina duzu? Lanbide-heziketa edo unibertsitate ikasketak dituzu? Lana lortzeko zailtasunak dituzu?

edo

Enpresa bat zara eta lanpostu zehatz batzuek betetzeko pertsonen profil jakin bat behar duzu? Buruan dituzun proiektuak gauzatu nahi dituzu?

Hala bada, jarraitu irakurtzen.

Urte hasieran, Errenteriako, Lezoko, Oiartzungo eta Pasaiako udalek, Oarsoaldea Garapen Agentziaren bidez HAZILAN egitasmoaren 3.edizioa abian jarri zuten, konpetentzia pertsonal eta profesionalak lantzeko egitasmoa, ikuspegi guztiz praktikoa duena eta enpresen beharretara egokitzen dena. Azken edizio hau bukatu berri dute eta dagoeneko, martxoan zehar, 4.deialdia irekiko du garapen agentziak.

Egitasmoaren helburua langabezian aurkitzen diren gazte kualifikatuak lan mundura hurbiltzen laguntzea da, beren lan aktibazio eta  lan txertaketa bultzatuaz, hori guztia prestakuntza saioak eta enpresekin harreman zuzenak sustatuz.

HAZILAN egitasmoaren deialdi berri hau, 20 eta 44 urte bitarteko pertsonei zuzendurik dago, edozein espezialitateko Goi Mailako Lanbide-Heziketa edota Unibertsitateko ikasketak dituztenak, eta baita giza baliabide kualifikatuak behar dituzten edo egitasmo berriak garatu nahi dituzten enpresei ere.

Aukeratuak diren pertsonek 80 ordutako formakuntza praktiko bat jasoko dute gaitasun pertsonal zein profesionaletan, ondoren beraien ibilbidea jarraituko dutelarik eskura jarriko zaizkien baliabide ezberdinen bidez; negozio bat martxan jartzen lagunduaz, enpresa batean praktikaldi bat beteaz, enpresa erreal batean proiektu zehatz bat garatuaz, prestakuntza zehatz bat burutuaz edo norberaren auto-hautagaitza prozesua planifikatuz teknikarien laguntza pertsonalizatuarekin.

Jexux Leonet, Oarsoaldea Eskualdeko Garapen Agentziaren Lehendakariaren hitzetan, “Hazilanek, gaitasunen eskuratzea lan arloan eskarmentu zehatza eskuratzea edo enpresek garatu nahi dituzten egitasmoak burutzea uztartzen ditu”.

Informazioa eta izen-ematea

Oarsoaldeak interesa duten pertsonentzat saio informatiboak antolatuko ditu, bertan programaren xehetasunak azaldu eta sor daitezken zalantzak argituko direlarik. Saio hauek martxoaren 15etik aurrera egingo dira Oarsoaldeak Pasaian dituen bulegoetan, Euskadi Etorbidean, Merkatuaren Eraikinean. Parte hartzeko interesa duten pertsonek, aldez aurretik Oarsoaldea garapen agentziara deitu beharko dute.

Izena emateko epea, gaurtik martxoaren 21 arte (martxoak 21 barne) izango da, ondoren inskribatutako guztiekin aukeraketa prozesu bat egingo delarik elkarrizketa baten bidez.

Animatu eta eman izena!

Plazak mugatuak dira.

943 404 101 / olibet@oarsoaldea.eus

GAZTEENTZAT INFORMAZIOA

ENPRESENTZAT INFORMAZIOA

• Eusko Jaurlaritzak onarturiko egitasmoa da, Europako Gizarte Funtsak %50ean diruz laguntzen duena, eta Garapenek kudeatuko duena.
• Guztira 20 garapen agentziek parte hartuko dute. Oarsoaldean Eskualdeko Garapen Agentziak kudeatuko du.
• Egitasmoaren aurrekontu totala 6.000.000 eurokoa izango da. Oarsoaldeakoa 300.000 euro ingurukoa.
• Egitasmoaren helburua 2016-2020 urteetan 5.000 gazte bere lan txertatze prozesuan laguntzea izango da eta horietarik %55a emakumezkoak izango dira.
• 5 urtetako iraupena izango du, urtez urteko deialdi bidez.

Programari buruzko informazio gehiago: hazilan.eus