Datorren ekainaren 12an, Donibane Lohizuneko Le Sélect zinemak BASERRIBERRI (Interreg POCTEFA) mugaz gaindiko proiektuaren itxiera ekitaldia hartuko du. Ekitaldi honek zurezko eraikuntzaren inguruko prestakuntzan aitzindaria den programa honi amaiera emango dio, Carlos Portellak zuzendu eta ikasleen esperientzia biltzen duen izen bereko dokumentalaren estreinaldi ofizialarekin. Jardunaldiak egitarau oparoa izango du, eta Nafarroako, Euskadiko nahiz Akitania Berriko eskualdeko gobernuetako agintarien presentzia nabarmena izango du lankidetza-ekimen arrakastatsu hau babesteko.

Estreinaldia: Carlos Portellaren lekukotasun bisuala

Jardunaldiko plater nagusia eta ardatza BASERRIBERRI dokumentalaren proiekzioa izango da, Carlos Portella Núñez zinemagile brasildarrak zuzendua; besteak beste, Gaucho Basko zuzentzeagatik ezaguna dena (France 3 Nouvelle-Aquitaine-rekin koproduzitua eta 2020ko Biarritz Amérique Latine Zinemaldian estreinatua).

Dokumentalaren laburpena:

Prestakuntza-prozesu osoan zehar bidelagun izanda ekoitzia, ikus-entzunezko lan honek Baserriberriko ikasleen bidaia humanoa eta teknikoa zintzotasunez dokumentatzen du. Ikasgeletako eta tailerretako lehen ikasgaietatik hasi, eta Tomasenea baserriko zurezko egituren benetako zaharberritzearekin amaitu arte. Eskulangintzako jakintzaren transmisioari eta mugaz gaindiko lankidetzaren indarrari buruzko ezinbesteko lekukotasuna.

Proiekzioaren aurretik, programan parte hartu dutenen lekukotasunak entzuteko aukera izango da.

Mugaz gaindiko prestakuntzan mugarri baten itxiera

Estreinaldi honek prestakuntza-ziklo aitzindari bati amaiera ematen dio. BASERRIBERRIk langabezian zeuden 12 pertsona prestatu ditu landa-eremuko eraikinak berritzeko erabil daitezkeen arotzeria-teknika tradizionaletan (horietatik 9k ziurtagiridun tituluak lortu dituzte). Hori guztia irakaskuntza-eredu bateratu baten bidez egin da. Bertan, Compagnons du Tour de France (Angelu), Donibane (Nafarroa), Easo Politeknikoa eta Bidasoa (Euskadi) ikastetxe publikoetako irakasleek indarrak batu dituzte tokiko ondare arkitektonikoa babesteko.

Peio Martikorena Fundazioak bultzatuta, arrakasta hau erakundeen inplikazio transdiziplinarrean oinarritzen da, honako lurralde hauetako entitateak elkartuz: Nafarroako Foru Komunitatea (Hezkuntza Departamentua, Nafarroako Enplegu Zerbitzua), Euskal Autonomia Erkidegoa (Hezkuntza Saila, Oarsoaldea Garapen Agentzia) eta Akitania Berria Eskualdea (Compagnons d'Anglet, Mission Locale Pays Basque).

EGITARAU OFIZIALA

Eguna eta Ordua: Ekainak 12, 09:30ean (parte-hartzaileei harrera 09:00etan).
Lekua: Le Sélect zinema, Donibane Lohizune, Victor Hugo bulebarra 29.
Itzulpen zerbitzua: Frantsesez, euskaraz eta gaztelaniaz bermatua.

Baserriberri proiektuaren %65 Europar Batasunak finantzatu du, Interreg VI-A Espainia-Frantzia-Andorra (POCTEFA2021-2027) programaren bidez.