Urtero bezala 50/50 proiektuan parte hartu duten ikastetxeetako ikasleek ikasturtean zehar landutako ohitura jasangarriak eta martxan jarritako praktika onak partekatu dituzte ekitaldian.

Argiak behar ez direnean itzaltzea, berogailua arduraz erabiltzea, ura alferrik ez galtzea edo energia-kontsumoari erreparatzea. Eguneroko keinu txikiak dira, baina garrantzi handia dute ingurumenarekiko kontzientzia eta ohitura arduratsuak lantzeko.

Ohitura horiek izan dira, hain zuzen ere, Karmengo Ama Ikastetxeak, Elizalde Herri Eskolak, Lezo Herri Eskolak, Cristobal Gamon Ikastetxeak eta Bizarain Ikastolak 50/50 proiektuaren barruan landutako gaietako batzuk.

Aurten ere, ikastetxe horietako hezkuntza-komunitateek egindako lana balorean jartzeko ekitaldia egin da. Bertan, ikasleek ikasturtean zehar garatutako jarduerak, martxan jarritako praktika onak eta jasangarritasunaren inguruan ikasitakoa partekatzeko aukera izan dute.

Ikasleak, eguneroko ohitura jasangarrien protagonistak

Ikasleek parte-hartze aktiboa izan dute proiektuan. Ikastetxe bakoitzean osatutako energia-taldeen bidez, irakasleekin, atezainekin eta hezkuntza-komunitateko beste kide batzuekin elkarlanean aritu dira.

Talde horietan, ikastetxeetako energia- eta ur-erabilera aztertu dute, eguneroko kontsumo-ohiturei erreparatuz. Azterketa horietatik abiatuta, baliabideak arduraz erabiltzeko proposamenak landu eta hainbat praktika jarri dituzte martxan.

Praktika onak

• Ahal den guztietan eguzkiaren argi naturala baliatzea.
• Gelak modu eta une egokietan aireztatzea, berokuntza sistema ez alferrik erabiltzeko; eta aireztatzeen iraupena gehienez 5 minutukoa izatea.
• Jolasgarai, asteburu edo oporretara joan aurretik argiteria eta gailu elektriko oro Itzalia geratzen dela ziurtatzeaz arduratuko den pertsona edo taldea izendatzea.
• Ikasgeletan beharrezkoak diren erradiadoreak bakarrik erabiltzea, besteen giltzak itxiz.
• Dutxetako uraren tenperatura modu egokian doitu.
• Dutxen iraupenak laburtzen saiatu.
• Ur txorrotak beharrezko denbora soilik izan irekita, eta ura ez alperrik xahutu.
• Ahozko eta kartel bidezko komunikazio kanpainak burutu, proiektuaren hasieraren berri emateko, momentu zehatzeko arazo edo xehetasunez informatzeko edo eskolan energia eta ura aurrezteko betebeharrak ezagutarazteko, etab.
• Aurrezpenak lortzea edo proiektuaren garapena oztopatzen duten arazo edo matxura desberdinei aurre egin, adibidez, termostatoen matxurak, instalakuntza zehatzen erabilera berri gehigarriak, instalakuntza gehigarriak, galdaren kudeaketan akatsak, etab.

Ekitaldian, ikasleek beraiek azaldu dituzte egindako jarduerak eta prozesuan zehar ikasitakoak, ikastetxe bakoitzeko esperientziak partekatuz.

Ekitaldian parte hartu edo bertaratu dira Teo Alberro, Pasaiako Alkatea, Iraitz Pazos, Ingurumen zinegotzia, Errenteriako udaletik Naroa Zabala eta Yolanda Martin, Ainara Lasarte Oarsoaldea Garapen Agentziako Hiri Berriztapen, Mugikortasun eta Energia Saileko zuzendariak; Gloria Vázquez Gipuzkoako Foru Aldundiko Jasangarritasun Departamentuko Ingurumen Administrazioko zuzendariak; Xabier Sesma Oarsoaldeako jasangarritasun-teknikariak eta 50/50 proiektuaren dinamizatzaileak; eta Nerea Ibáñez Arazi ingurumen-aholkularitzako ordezkariak. Halaber, Errenteria, Lezo, Oiartzun eta Pasaiako udaletako ordezkariak eta teknikariak izan dira bertan, baita proiektuan parte hartu duten ikastetxeetako ikasleak eta hezkuntza-komunitateko kideak ere.

Jasangarritasuna, egunerokoan lantzen den balioa

50/50 proiektua hezkuntza-komunitatean energia eta uraren erabilera arduratsua sustatzeko ekimena da. Ingurumen-hezkuntza, ikasleen parte-hartzea eta eguneroko ohituren inguruko hausnarketa uztartzen ditu.

Proiektuaren bidez, ikasleek aukera dute ikastetxeetako baliabideen erabilera gertutik ezagutzeko, kontsumo-ohiturei buruz hausnartzeko eta ingurumenaren zaintzarekin lotutako erabakiak hartzen ikasteko.

Ikasgeletan landutako ezagutzak eguneroko bizitzara eramatea ere bada ekimenaren helburuetako bat. 
Hezkuntza-komunitatearen elkarlana

Ikasleekin batera, irakasleek, atezainek, ikastetxeetako gainerako langileek eta familiek ere parte hartzen dute eguneroko ohitura jasangarriak lantzeko prozesuan.
 

Aurtengo ekitaldia ikastetxeetako esperientziak ezagutzeko eta ikasleek egindako lana partekatzeko topagunea izan da.
Jasangarritasuna eguneroko erabakiekin lotuta dagoela eta ingurumenaren zaintza guztion ardura dela izan da ikastetxeetan landutako mezu nagusietako bat.