Tokiko merkataritza indartzeko eta ekintzailetza sustatzeko helburuarekin, Eusko Jaurlaritzako Turismo, Merkataritza eta Kontsumo Sailak MerkaEkin 2026 laguntza-programaren deialdia argitaratu du. Laguntza hauek merkataritza-proiektu berriak martxan jartzea, dagoeneko martxan dauden negozioak dibertsifikatzea eta belaunaldi-erreleboa zein negozioen jarraipena erraztea dute xede, herrietako jarduera ekonomikoa eta gertuko merkataritza sare bizia sendotzen lagunduz.

Laguntzak bi ildotan banatzen dira:

Merkataritza-Ekintzaile Aholkularitza

Negozio-plan bat garatzeko aholkularitza teknikoa finantzatzen du. Laguntza honen bidez, ekintzaileek beren negozio-ideia heldu eta bideragarritasun azterketa egiteko aukera izango dute.
Dirulaguntzak onartutako gastuaren %80 estaltzen du, gehienez 5.000 euroraino, eta gutxienez 25 aholkularitza-ordu jaso beharko dira.

Merkataritza-Ekintzaile Ekin+

Negozio berriak martxan jartzeko edo jarduera berriak garatzeko beharrezkoak diren inbertsioak eta gastuak finantzatzeko laguntzak dira.
Diruz lagundu daitezkeen inbertsioen artean daude:

• Merkataritza-lokalaren egokitzapena eta instalazio teknikoak.
• Altzariak eta ekipamendua.
• Makineria espezializatua.
• Teknologia eta digitalizazioarekin lotutako ekipamenduak.
• Ibilgailuak erostea.
• Negozio-eskualdatze eskubideak.

Era berean, gastu hauek ere lagundu daitezke:

• Eraketa-gastuak.
• Lokalari lotutako gastuak.
• Marketin eta sustapen jarduerak.
• Prestakuntza espezializatua.
• Negozioa garatzeko azterketa estrategikoak.
• Leasing, renting eta ibilgailuen alokairua.

Inbertsioetarako laguntzak gehienez 25.000 eurokoak izan daitezke, eta gastuetarako laguntzak gehienez 7.500 eurokoak.

Norentzat dira laguntzak?

Laguntzak Euskal Autonomia Erkidegoan kokatutako kaleko merkataritza-establezimenduei zuzenduta daude, besteak beste:

• Elikadura eta edarien txikizkako merkataritza.
• Elikaduraz bestelako produktuen txikizkako merkataritza.
• Merkataritza mistoa edo integratua.
• Etxerako gai elektrikoen eta bestelako kontsumo-ondasunen konponketa.
• Zerbitzu pertsonalak.

Gauzatzea: 2026/01/01etik 2026/12/31ra, biak barne.

Eskaerak aurkezteko epea

Eskabideak 2026ko irailaren 15era aurkeztu ahal izango dira, edo aurrekontua agortu arte.
Laguntzak eskabideak jasotzen diren hurrenkeran emango dira; beraz, interesa duten pertsonei eta enpresei eskaera lehenbailehen egitea gomendatzen zaie.

Informazio gehiago

Laguntzen oinarriak eta eskaera egiteko informazio guztia Eusko Jaurlaritzaren webgunean kontsulta daiteke:

MerkaEkin 2026 merkataritza-ekintzailetzarako laguntzen deialdia - Eusko Jaurlaritza