Topaketa OARSOLAN zentroan egin da, eta tokiko ekimenak aurkezteko eta eskualdean gizarteratzearen eta laneratzearen alde lan egiten duten eragileen sarea indartzeko balio izan du. Mikel Arruti, Lezoko alkatea ere bertan izan da. 

OARSOLAN Enplegurako eta Inklusiorako Berrikuntza Zentroak "Oarsoaldeko Inklusio Topaketak" zikloaren bigarren jardunaldia egin du, oraingoan "Aniztasuna eta Inklusioa" ri eskainita. Ekitaldiak gizarte erakundeetako, prestakuntza zentroetako, enplegu zerbitzuetako eta administrazioetako profesionalak bildu ditu OARSOLAN zentroan bertan.

Saio honen helburu nagusia aniztasunaren kontzeptuan sakontzea eta Oarsoaldean inklusioaren arloan lan egiten duten eragile ezberdinen artean elkar ezagutzeko prozesuan urrats berriak ematea izan da.

Edukia eta parte-hartzea

Eskualdean inklusioa errazteko garatzen ari diren tokiko ekimenen aurkezpenaren inguruan antolatu da jardunaldia. Esperientzia praktikoen truke horri esker, lurraldean egiten den sareko lana ikusarazi ahal izan da, tokiko errealitateek ekosistema inklusiboa nola aberasten duten azpimarratuz.
Topaketaren formatuak parte hartzea eta bertaratuen arteko elkarrizketa sustatu ditu, jardunbide egokiak partekatzeko, erronka komunei buruz hausnartzeko eta aliantzak indartzeko gune ezin hobea sortuz, gizarte abegikorragoa eraikitzeko.

Hurrengo topaketak

Bigarren topaketa honen ondoren, OARSOLANek, Oarsoaldeko Eskualdeko Inklusio Sarearen eskutik, hurrengo jardunaldiak antolatzen jarraituko du, "50 urtetik gorako pertsonen enplegagarritasuna" eta "enpresek gizarteratze prozesuetan duten garrantzia" bezalako gaiak jorratuz.

Saio horiek OARSOLANen konpromisoa indartzen dute, gizarte-berrikuntzarako gune gisa, lan-merkatu inklusiboagoa eta bidezkoagoa eraikitzeko sare eta ezagutza espezializatuak sortuz.

Aitorpenak

Patxi Arrazola OARSOLANeko arduradunak honako hau nabarmendu du: "Bigarren topaketa honek eskualdean egiten dugun sare-lanari balioa ematearen garrantzia berretsi du. Abian dauden ekimenak ezagutzea eta trukatzea funtsezko urratsa da egiten ditugun esku-hartzeetan lankidetza eta lanketa integrala sustatzeko. Jardunaldi hauek profesionalentzat eta enpresentzat tresna baliagarriak izan daitezen lan egiten jarraituko dugu. "